abbas-tabish

Chand Ka Patthar Bandh Ke Tan Se Utri Manzar-e-Khwab Mein Chup

chand ka patthar bandh ke tan se utri manzar-e-khvab men chup

chidiyan duur sidhar gaiin aur Duub gai talab men chup

lafzon ke batvare men is chikh-bhare gahvare men

bol to ham bhi sakte hain par shamil hai adab men chup

pahle to chaupal men apna jism chatakhta rahta tha

chal nikli jab baat safar ki phail gai aasab men chup

ab to ham yuun rahte hain is hijr-bhare virane men

jaise aankh men aansu gum ho jaise harf kitab men chup

apni aahat ko bhi apne saath nahin le jaate vo

teri raah pe chalne vaale rakhte hain asbab men chup

More Poems

Leave a Comment