ye jo rabt ru-ba-zaval hai ye saval hai
mujhe is ka kitna malal hai ye saval hai
ye jo sar pe mere vabal hai ye saval hai
ye jo gird-o-pesh ka haal hai ye saval hai
mujhe kya gharaz mire dushmanon ka hadaf hai kya
mire paas kaun si Dhaal hai ye saval hai
mire saare ḳhvab hain mo’tabar main huun dar-ba-dar
ye uruuj hai ki zaval hai ye saval hai
mire haath shal mire paanv shal miri aql gum
koi aur itna niDhal hai ye saval hai
mira maazi kitna amiir tha main gharib huun
koi ye bhi mazi-o-hal hai ye saval hai
koi hai jo mujh sa aziim ho jo fahim ho
ye saval koi saval hai ye saval hai
na.e ahd ki ye taraqqiyan ye tajalliyan
koi is men mera kamal hai ye saval hai
vo sada na thi vo to jazb tha vo to ishq tha
miri saf men koi bilal hai ye saval hai
Leave a Reply