haTe ye aa.ina mahfil se aur tu aa.e
koi to ho jo kabhi dil ke ru-ba-ru aa.e
mire lahu se agar ho ke surḳh-ru aa.e
malo to barg-e-hina men vafa ki bu aa.e
vo ansuon ki safa.i se bad-guman hain abas
dil-o-jigar men raha kya hai jo lahu aa.e
shab-e-visal bhi ta-sub.h mutma.in na raha
abhi thi raat ki paigham-e-arzu aa.e
bayan-e-barq-e-tajalli chhuḌa hai ab sar-e-tur
ajab nahin mire dil ki bhi guftugu aa.e
visal-o-hijr men chhupta hai dil ka haal kahin
bujhe to pyaas siva ho jale to bu aa.e
jo mai ke dene men pir-e-mughan ko tha inkar
dilon ko toḌne kyuun shisha-o-subu aa.e
ajab hai utre dam-e-zabh un ki aankh men ḳhuun
kaTin kahan ki ragen aur kahan lahu aa.e
kiya saval to us dar se ye sada aa.i
use javab hai jo le ke aarzu aa.e
jahan men hain subuk-bar kab shagufta-mizaj
chaman ke phuul liye bar-e-rang-o-bu aa.e
miri zaban ko kanTa samajhta hai sayyad
nikal le ki na ye ho na guftugu aa.e
jhaTak rahi hai mira ḳhuun apne daman se
tumhari tegh hai phir kya vafa ki bu aa.e
madad de itni taḌapne men inqilab-e-jahan
jo mere dil men nihan hai vo ru-ba-ru aa.e
baḌha baḌha ke mira dil laga.iye talvar
jagah jafa ki siva ho agar numu aa.e
Leave a Reply