Aziz Nabeel
us ki sochen aur us ki guftugu meri tarah
vo sunahra aadmi tha hu-ba-hu meri tarah
ek barg-e-be-shajar aur ik sada-e-bazgasht
donon avara phire hain ku-ba-ku meri tarah
chand taare ik diya aur raat ka komal badan
sub.h-dam bikhre paḌe the chaar su meri tarah
lutf avega bahut ai sakinan-e-qasr-e-naz
be-dar-o-divar bhi rahiyo kabhu meri tarah
dekhna phir lazzat-e-kaifiyyat-e-tishna-labi
toḌ de pahle sabhi jam-o-subu meri tarah
ik piyada sar karega saara maidan-e-jadal
shart hai josh-e-junun aur justuju meri tarah
Leave a Reply