koi bimar paḌ jaa.e to achchha kaise karte ho
dikhao to masiha.i ka daava kaise karte ho
hazaron jagti ankhen suragh us ka nahin patin
tum ankhen band kar ke us ko dekha kaise karte ho
agar be-mehr hai to roz kyuun ja ja ke milte ho
agar patthar use kahte ho sajda kaise karte ho
haya aisi adab itna hamari aql hairan hai
are tum mard ho kar us se parda kaise karte ho
ye aansu toḌ dega sab hisar-e-jism-o-jan ik din
ye dariya jab umaDta hai to roka kaise karte ho
vo apni ghar grihasti men magan hai Thiik hi to hai
jise paana nahin us ki tamanna kaise karte ho
Leave a Reply