ravayye maar dete hain ye lahje maar dete hain
vahi jo jaan se pyare hain rishte maar dete hain
kabhi barson guzarne par kahin bhi kuchh nahin hota
kabhi aisa bhi hota hai ki lamhe maar dete hain
kabhi manzil pe jaane ke nishan tak bhi nahin milte
jo raston men bhaTak jaa.en to raste maar dete hain
kahani ḳhatm hoti hai kabhi anjam se pahle
adhure na-mukammal se ye qisse maar dete hain
hazaron vaar duniya ke sahe jaate hain hans hans ke
magar apnon ke ta.ane aur shikve maar dete hain
mujhe aksar ye lagta hai ki jaise huun nahin huun main
mujhe hone na hone ke ye ḳhadshe maar dete hain
kabhi marne se pahle bhi bashar ko marna paḌta hai
yahan jiine ke milte hain jo sadme maar dete hain
bahut ehsan jatane se ta.alluq TuuT jaata hai
bahut isar-o-qurbani ke jazbe maar dete hain
kabhi tufan ki zad se bhi safine bach nikalte hain
kabhi salim safinon ko kinare maar dete hain
vo hissa kaaT Daala zahr ka ḳhadsha raha jis men
jo baaqi rah ga.e mujh men vo hisse maar dete hain
jo ankhon men rahen ‘nuzhat’ vahi to ḳhvab achchhe hain
jinhen ta.abir mil jaa.e vo sapne maar dete hain
Leave a Reply