shikva sun kar jo mizaj-e-but-e-bad-khu badla
ham ne bhi saath hi taqrir ka pahlu badla
kahiye to kis ke phansane ki ye tadbiren hain
aaj kyuun chin-ba-jabin se kham-e-gesu badla
ik tira rabt ki do din kabhi yaksan na raha
ik mira haal ki hargiz na sar-e-mu badla
un hasinon hi ko zeba hai talavvun ai dil
haan khabar-dar jo bhule se kabhi tu badla
dil-e-muztar ki tadap se jo main tadpa ‘bekhud’
chara-gar khush hain ki bimar ne pahlu badla
Leave a Reply