poet

Mumkin Nahin Dawa Hai Is Aazar Ke Liye

mumkin nahin dava hai is azar ke liye

behtar hai maut ashiq-e-bimar ke liye

mar kar hua huun khaak dar-e-yar ke liye

saaya bana huun main tiri divar ke liye

dam-e-bala-e-hasti-e-mauhum men phansa

behtar yahi saza thi gunahgar ke liye

kyunkar raqib aaen na mahfil men aap ki

hai khaar gul ke vaste gul khaar ke liye

pa-bosiyon ke shauq men apna ye lauh-e-dil

ik khaal ban gaya qadam-e-yar ke liye

jalva dikha de khvab men bahr-e-khuda mujhe

ankhen taras gaiin tire didar ke liye

bachchon ki tarah ham ne is aghosh-e-naz men

paala tha dil ko tujh se dil-azar ke liye

ab shaikh-o-barhaman mire daman ke taar ko

aate hain lene subha-o-zunnar ke liye

munis jo ek dil tha vo ghul kar firaq se

aansu bana hai chashm-e-guhar-bar ke liye

us rukh ko dekhte hi dil-e-zar ne kaha

zeba hai ghaza aisa hi rukhsar ke liye

kya hal-e-dil sunaun ‘jamila’ ki zoaf se

quvvat zaban men chahiye izhar ke liye

More Poems

Leave a Comment