Nitin Nayab
phir ye mumkin hi nahin hai ki sambhalo mujh ko
ik zara qaid se bahar to nikalo mujh ko
is haqiqat ki bhi aamad ho mire hujre men
chhoḌ ke jaao kabhi ḳhvabo ḳhayalo mujh ko
jism ko dard men hansne ka hunar aata hai
iltija ye hai ki patthar men na Dhalo mujh ko
main ne pabandi laga di hai zaban par varna
mudda.a chiḳh raha hai ki uchhalo mujh ko
tab talak kuza-garo ḳhvab hai ta.abir miri
jab talak puuri tarah toḌ na Daalo mujh ko
mavara huun main har ik lafz-e-suḳhan se jo mujhe
tum ko paḌhna hai to phir soch men Dhalo mujh ko
lo main karta huun miri ḳhaak tumhare hi sipurd
jaisi darkar ho vaisa hi bana lo mujh ko
pahle malbe ko mire saaf karo uupar se
phir miri ḳhaak ke niche se nikalo mujh ko
ankhen neze pe Tike dekh ke apni ‘nayab’
bol uThe ḳhvab bhi ab to ki na paalo mujh ko
Leave a Reply