Poet
hai mujhe pas-e-vafa ai but-e-ayyar faqat
varna kuchh tu hi nahin ek tarah-dar faqat
aarzu is dil-e-shaida ki yahi hai ki tira
ek bosa kabhi de de lab-e-sofar faqat
va.iza ḳhuld ko ham le ke karen kya ham ko
rashk-e-sad-ḳhuld hai vo saya-e-divar faqat
faḳhr samjhe hain sab abna-e-jahan da.ave ko
hai agar aar to ik mujh hi ko hai aar faqat
ai gul-andam tire sar ki qasam ghairon ki
ḳhaar hai ek ye nazron men gunahgar faqat
ai falak aur nahin kuchh havas-e-dil un se
hal-e-dil apna kiya chahun huun iz.har faqat
charagar suda-e-almas chhiḌak mushk ke saath
dil ke zaḳhmon par na rakh marham-e-zangar faqat
yuun to sab misri ki Daliyan hain magar ‘aish’ suna
dil-pasand apne hain ik ‘mir’ ke ash.ar faqat
Leave a Reply