vo shaḳhs kaun tha muḌ muḌ ke dekhta tha mujhe
akela baiTh ke pahron jo sochta tha mujhe
main us ke paas se guzra to ye hua mahsus
vo dhuup sar pe liye chhanv de raha tha mujhe
ulaT raha tha miri zindagi ke vo auraq
kisi kitab ki manind paḌh raha tha mujhe
usi men dekh raha tha main apna aks-e-ḳhayal
vo ek chehra ki jo aa.ina laga tha mujhe
ab us ki yaad liye phir raha huun shahr-ba-shahr
kabhi sukun ka lamha jo de gaya tha mujhe
vo shaḳhs mere tavajjoh ka ban gaya tha madar
na jaane kaun sa manzar dikha raha tha mujhe
main us ke jism ka saaya tha sar-basar ‘ḳhalid’
jo raushni ka samundar sa lag raha tha mujhe
Leave a Reply