Shahnawaz Ansari
udaas dhuup se rishta bahal karne men
daraḳht suukh ga.e ye kamal karne men
har ek baar ghamon ka mizaj badla tha
ḳhushi se aankh mila kar malal karne men
hamara dil bhi raha zimmedar maan liya
tumhen kyon vaqt laga isti.mal karne men
badan ki aanch saron par uThani paḌti hai
kisi charagh se ḳhud ko mash.al karne men
adhuri ḳhvahishen ghazlon men Dhal ga.iin meri
ik aarzu ko mukammal ḳhayal karne men
hava se rabta karna paḌa shararon ko
siyah rang ko aksar gulal karne men
qusur-var to the hi vo be-adab bhi the
saza.en bhuul ga.e jo saval karne men
Leave a Reply