Altaf Mashhadi
aa chal ke basen hamdam-e-dairina kahin aur
main DhunDh nikalunga falak aur zamin aur
bachti hui nazron se Tapakte hain fasane
ijad takallum ki hui tarz-e-hasin aur
gul-ha-e-tabassum pe nazar Dalne vaale
in honThon men pinhan hain ka.i ḳhuld-e-barin aur
zau-bar-o-daraḳhshan hai ye anvar-e-ḳhudi se
sajdon ki siyahi ko hai matlub jabin aur
ik ashk men tabdil hua apna sarapa
kuchh maang le ulfat se miri jan-e-hazin aur
zulfon ko zara aur bhi ankhon pe jhuka do
maiḳhane se badal ko karo kuchh to qarin aur
‘altaf’ mujhe jis ne diya dard-e-mohabbat
us aankh men kya aisi koi chiiz nahin aur
Leave a Reply