ye hasin honge mehrban mire ba.ad
anDe dengi ye murghiyan mire ba.ad
main to mar ja.unga magar socho
kya karengi tumhari maan mire ba.ad
ḳhuub abhi qahqaha laga lo tum
bhon-bhon ro.o.ge mehrban mire ba.ad
jab na dekhega vo bahar-e-chaman
mar hi ja.ega baghban mire ba.ad
baḌh ga.i hai jo aaj kal mire dost
khinchi ja.egi vo zaban mire ba.ad
dekh kar hashr-ḳhez hangame
rafu-chakkar hui amaan mire ba.ad
tum shikam-ser kis tarah hoge
kaun paTega ye kuaan mare ba.ad
gul to gul tang aa ke kanTe bhi
denge gulchin ko galiyan mire ba.ad
jis men aksar ḳhulus milta tha
ho ga.i band vo dukan mire ba.ad
jahan jhukte hain sar salatin ke
hai muqaffal vo astan mire ba.ad
roz uḌate hain jo man-o-salva
vo chaba.enge Thurriyan mire ba.ad
mire qabil nahin abhi ye hasin
ye chalengi davanniyan mire ba.ad
lab-e-shirin ki qadr hai mujh se
munh pe bhinkengi makkhiyan mire ba.ad
sar-bulandi jinhen nasib hai ‘shauq’
kal vo kha.enge jutiyan mire ba.ad
Leave a Reply