tamam umr ki tanha.iyon pe bhari thi
vo ek shaam tire saath jo guzari thi
ufuq pe likhta raha aftab tahriren
magar bayaz-e-zamin raushni se aari thi
safir-e-sub.h ki aahaT pe ho ga.i bedar
ghunudgi men jo ḳhvabida shab-ḳhumari thi
usi ne kar diya paivast piiTh men ḳhanjar
vo shaḳhs jis ki rifaqat se piiTh bhari thi
dil-o-dimagh ne phir hashiye tarash liye
ka.i dinon se tabi.at men na-gavari thi
jo baat tark-e-ta.alluq ke moḌ tak pahunchi
ḳhata tumhari nahin thi ḳhata hamari thi
javab de diye ‘salim’ hayat ne mujh ko
magar savaliya ik ik javab-dari thi
Leave a Reply