agahi men ik khala maujud hai
is ka matlab hai khuda maujud hai
hai yaqinan kuchh magar vazeh nahin
aap ki ankhon men kya maujud hai
bankpan men aur koi shai nahin
sadgi ki intiha maujud hai
hai mukammal badshahi ki dalil
ghar men gar ik boriya maujud hai
shauqiya koi nahin hota ghalat
is men kuchh teri raza maujud hai
is liye tanha huun main garm-e-safar
qafile men rahnuma maujud hai
har mohabbat ki bina hai chashni
har lagan men muddaa maujud hai
har jagah har shahr har iqlim men
dhuum hai us ki jo na-maujud hai
jis se chhupna chahta huun main ‘adam’
vo sitamgar ja-ba-ja maujud hai
Leave a Reply