sarshar bhi karti hai ghazal leti hai jaan bhi
ḳhushbu ke barabar se nikalta hai dhuan bhi
hoti thiin kabhi shaam ki ninden bhi mayassar
ankhon men guzar jaati hai ab pahli azaan bhi
pahchan faqat nam-o-nasab se nahin hoti
shajre ka pata deti hai insan ki zaban bhi
kis tarah kiya tu ne mohabbat ka izala
puura na hua mujh se to lamhon ka ziyan bhi
kuchh daḳhl nahin mera miyan kar-e-junun men
ab ishq pe hai mujh ko ye le jaa.e jahan bhi
is duniya men kar mujh se na.e jazbon ki ḳhvahish
matruk nahin chalte ‘hasan’ sikke yahan bhi
Leave a Reply