Nadir Shahjahanpuri
lagta nahin kahin bhi mira dil tire baghair
donon jahan nahin mire qabil tire baghair
kuchh lutf-e-zindagi nahin hasil tire baghair
pal bhar guzarna bhi hai mushkil tire baghair
tu hi nahin to kaun kare meri rahbari
kaTti nahin hayat ki manzil tire baghair
dil par mire hi shaaq nahin hai tira firaq
ḳhamosh hain chaman men anadil tire baghair
phulon ke ibtisam pe aati hai ab hansi
aisa bujha hua hai mira dil tire baghair
hosh-o-havas-o-aql-o-ḳhirad de ga.e javab
yaani nahin huun main kisi qabil tire baghair
har dam ye soch hai mire jiine se fa.eda
jab maqsad-e-hayat hai batil tire baghair
takmil-e-arzu se hai takmil-e-zindagi
kyunkar ho zindagi miri kamil tire baghair
kashti nikal to aa.i hai gardab se magar
dil Dubne laga lab-e-sahil tire baghair
har dam taḌap ke loTta phirta huun ḳhaak par
goya bana huun ta.ir-e-bismil tire baghair
ankhen hi pahle roti thiin ab to ye qahr hai
rone laga hai ḳhuun mira dil tire baghair
‘nadir’ ko jaan dene se kyuun rokta hai tu
jiine se bhi hai kya use hasil tire baghair
Leave a Reply