Gulshan Gulshan KHak uDi Aur Viranon Mein Phul Khile

Murtaza Ali Shad

gulshan gulshan ḳhaak uḌi aur viranon men phuul khile

ab ke baras yuun mausam badla zindanon men phuul khile

ḳhushbu rut ne jaate jaate dil par aisi dastak di

bhuli bisri yaden jagin gul-danon men phuul khile

ju-e-lahu ankhon se phuTi kisht-e-vafa sairab hui

ḳhun-e-gulu jab dasht pe chamka afsanon men phuul khile

Duub sako to pyaar ka sagar aaj bhi hai payab bahut

sahil se kya dekh sakoge tufanon men phuul khile

aaj achanak is kuche men le aa.e avara qadam

jis kuche men barson guzre armanon men phuul khile

ḳhvab hue vo din jab dil ki baton men aa jaate the

ab to ye bhi yaad nahin kab paimanon men phuul khile