main gahri niind men tha jab ki ye bheji ga.i duniya
ab isti.mal karni hai mujhe de di ga.i duniya
ba-vaqt-e-sub.h lagta tha ki kuchh-kuchh dastaras men hai
jo aa.i shaam hathon se mire le li ga.i duniya
paḌi hai ja-ba-ja TuuTe hue shishe ke TukḌon si
kisi anjan khiḌki se kabhi phenki ga.i duniya
mire dar par na.e din ko mahakte phuul ki surat
sahar jo rakh ga.i thi shaam ko leti ga.i duniya
ye apna desh hai aa ja.enge vapas yahin phir bhi
chalo DhunDen use jo ḳhvab men dekhi ga.i duniya
Leave a Reply