duuri men kyuun ki ho na tamanna huzur ki
manzil ko meri qurb se nisbat hai duur ki
furqat ne us ki vasl ki tashvish duur ki
taskin nahin hai yuun bhi dil-e-na-subur ki
muusa ke sar pe paanv hai ahl-e-nigah ka
us ki gali men ḳhaak uḌi koh-e-tur ki
kahta hai anjuman ko tiri ḳhuld mudda.i
is bul-havas ke dil men tamanna hai huur ki
vaa.iz ne mai-kade ko jo dekha to jal gaya
phaila gaya charand sharab-e-tahur ki
muusa ko kyuun na mauj-e-tajalli dhakel de
jalve se us ke gul hui mash.al shu.ur ki
arbab-e-vaqt jante hain rozgar ne
ki sahv se vafa to talafi zarur ki
rusva.iyon ka hausla ghaT ghaT ke baḌh gaya
saman hai ḳhamushi miri shor-e-nushur ki
mel asman ka su-e-zamin be-sabab nahin
zer-e-qadam jagah hai sar-e-pur-ghurur ki
us se na miliye jis se mile dil tamam umr
sujhi hamen bhi hijr men aḳhir ko duur ki
pamal kar raha hai siyah-roziyon ka josh
miTTi ḳharab hai mire kalabe men nuur ki
kya ek qurb-e-ghair ka sadma na pochhiye
hain dil ke aas paas bala duur duur ki
mazmun mire uḌaa.e ‘qalaq’ sab ne is qadar
sunta huun main tarana zabani tuyur ki
Leave a Reply