vo kitab-e-husn vo ilm o adab ki taliba
vo mohazzab vo muaddab vo muqaddas rahiba
kis qadar pairaya parvar aur kitni sada-kar
kis qadar sanjida o khamosh kitni ba-vaqar
gesu-e-pur-kham savad-e-dosh tak pahunche hue
aur kuchh bikhre hue uljhe hue simte hue
rang men us ke azab-e-khirgi shamil nahin
kaif-e-ehsasat ki afsurdagi shamil nahin
vo mire aate hi us ki nukta-parvar khamushi
jaise koi huur ban jaae yakayak falsafi
mujh pe kya khud apni fitrat par bhi vo khulti nahin
aisi pur-asrar ladki main ne dekhi hi nahin
dukhtaran-e-shahr ki hoti hai jab mahfil kahin
vo taaruf ke liye aage kabhi badhti nahin
Leave a Reply