Samad Ansari
chashm-e-hairan ko yuun hi mahv-e-nazar chhoḌ ga.e
dil men lahra.e ḳhayalon men sharar chhoḌ ga.e
jin ke saa.e men kabhi baiTh ke sustaya tha
vo ghane peḌ miri rah-guzar chhoḌ ga.e
muntazir un ke liye hai kisi girdab ki aankh
ḳhud safinon ko jo hangam-e-ḳhatar chhoḌ ga.e
qafile nuur ke utre na kisi manzil par
shab ke nam-dida kinaron pe sahar chhoḌ ga.e
ḳhirgi hai ki utarti hi nahin ankhon se
kin andheron men hamen shams-o-qamar chhoḌ ga.e
le ga.e log jabinon men ibadat ka ghurur
kitne sajdon ko magar ḳhak-basar chhoḌ ga.e
aa.e ankhon men na dam bhar ko sulagte aansu
parda-e-chashm pe ik naqsh magar chhoḌ ga.e
raat ke aks jo shabnam men utarne aa.e
kitne phulon men ‘samad’ dagh-e-jigar chhoḌ ga.e
Leave a Reply