tasavvur kahkashan hota nahin hai
to ab mujh se bayan hota nahin hai
taḌap meri jabin ki baḌh ga.i hai
magar tu astan hota nahin hai
miri qismat men hai jalta sitara
bikhar ke jo dhuan hota nahin hai
miri sanson men tu aTka hua hai
tabi.at men ravan hota nahin hai
ḳhushi ab bhi mujhe hoti hai lekin
vo pahla sa saman hota nahin hai
vo dariya hai jahan ik baar guzre
vo rasta be-nishan hota nahin hai
main us ke saath chalti ja rahi huun
jo mera karvan hota nahin hai
tujhe ashkon men main kaise baha duun
tu mujh se ra.egan hota nahin hai
mire lafzon men hai zahir magar tu
nigahon se ayaan hota nahin hai
Leave a Reply