mufahamat na sikha jabr-e-narava se mujhe
main sar-ba-kaf huun lada de kisi bala se mujhe
zaban ne jism ka kuchh zahr to ugal daala
bahut sukun mila talkhi-e-nava se mujhe
racha hua hai badan men abhi surur-e-gunah
abhi to khauf nahin aaega saza se mujhe
main khaak se huun mujhe khaak jazb kar legi
agarche saans mile umr bhar hava se mujhe
ghiza isi men miri main isi zamin ki ghiza
sada phir aati hai kyuun parda-e-khala se mujhe
main ji raha huun abhi ai zamin-e-adam-khor
abhi to dekh na tu itni ishtiha se mujhe
bikhar chuka huun main ab mujh ko mujtama kar le
tu ab samet bhi apni kisi sada se mujhe
main mar raha huun phir aae sada-e-kun-fayakun
banaya jaae mita ke phir ibtida se mujhe
main sar-ba-sajda huun ai ‘shimr’ mujh ko qatl bhi kar
rihai de bhi ab is ahd-e-karbala se mujhe
main kuchh nahin huun to phir kyuun mujhe banaya gaya
ye puchhne ki ijazat nahin khuda se mujhe
main reza reza badan ka utha raha huun ‘adim’
vo tod hi to gaya apni iltija se mujhe
Leave a Reply