kuchh aisa pas-e-ghairat uTh gaya is ahd-e-pur-fan men
ki zevar ho gaya tauq-e-ghulami apni gardan men
shajar sakte men hain ḳhamosh hain bulbul nasheman men
sidhara qafila phulon ka sannaTa hai gulshan men
garan thi dhuup aur shabnam bhi jin paudon ko gulshan men
tiri qudrat se vo phule-phale sahra ke daman men
hava-e-taza dil ko ḳhud-baḳhud bechain karti hai
qafas men kah gaya koi bahar aa.i hai gulshan men
miTana tha use bhi jazba-e-shauq-e-fana tujh ko
nishan-e-qabr-e-majnun daagh hai sahra ke daman men
zamana men nahin ahl-e-hunar ka qadar-dan baaqi
nahin to saikḌon moti hain is dariya ke daman men
yahan tasbih ka halqa vahan zunnar ka phanda
asiri lazmi hai maz.hab-e-shaiḳh-o-barahman men
jinhen sincha tha ḳhun-e-dil se agle baghbanon ne
taraste ab hain paani ko vo paude mere gulshan men
dikhaya mo.ajiza husn-e-bashar ka dast-e-qudrat ne
bhari tasir tasvir-e-gili ke rang-o-roghan men
shahid-e-yas huun rusva huun nakami ke hathon se
jigar ka chaak baḌh kar aa gaya hai mere daman men
jahan men rah ke yuun qaa.em huun apni be-sabati par
ki jaise aks-e-gul rahta hai ab-e-ju-e-gulshan men
sharab-e-husn ko kuchh aur hi tasir deta hai
javani ke numu se be-ḳhabar hona laḌakpan men
shabab aaya hai paida rang hai ruḳhsar-e-nazuk se
farogh-e-husn kahta hai sahar hoti hai gulshan men
nahin hota hai muhtaj-e-numa.ish faiz shabnam ka
andheri raat men moti luTa jaati hai gulshan men
mata-e-dard-e-dil ik daulat-e-bedar hai mujh ko
dur-e-shahvar hain ashk-e-mohabbat mere daman men
na batla.i kisi ne bhi haqiqat raz-e-hasti ki
buton se ja ke sar phoḌa bahut dair-e-barahman men
purani kavishen dair-o-haram ki miTti jaati hai
na.i tahzib ke jhagḌe hain ab shaiḳh-o-barahman men
uḌa kar le ga.i bad-e-ḳhizan is saal us ko bhi
raha tha ek barg-e-zard baaqi mere gulshan men
vatan ki ḳhaak se mar kar bhi ham ko uns baaqi hai
maza daman-e-madar ka hai is miTTi ke daman men
Leave a Reply