Aziz Lakhnavi
ghalat hai dil pe qabza kya karegi be-ḳhudi meri
ye jins-e-mushtarak hai jo kabhi un ki kabhi meri
hijab uThte chale jaate hain aur main baḌhta jaata huun
kahan tak mujh ko le jaati hai dekhun be-ḳhudi meri
tavahhum tha mujhe naqsh-e-dui kis tarah miTta hai
naqab-e-ruḳh ulaT kar is ne surat khinch di meri
idhar bhi uḌ ke aa ḳhakistar-e-dil muntazir main huun
laga luun tujh ko ankhon se tu hi hai zindagi meri
‘aziz’ ik din mujhe ye razdari ḳhatm kar degi
kisi ne baat idhar ki aur rangat uḌ ga.i meri
Leave a Reply