Akhtar Ansari Akbarabadi
ye rang-o-kaif kahan tha shabab se pahle
nazar kuchh aur thi mauj-e-sharab se pahle
na jaane haal ho kya daur-e-iztirab ke ba.ad
sukun mila na kabhi iztirab se pahle
vahi gharib hain ḳhana-ḳharab se ab bhi
ravan-davan the jo ḳhana-ḳharab se pahle
vahi hai hashr ka aalam ab inqalab ke ba.ad
jo hashr uTha tha yahan inqalab se pahle
mili hai tujh se to mahsus ho rahi hai nazar
nazar kahan thi tire intiḳhab se pahle
tabah haal zamane ko dekhiye ‘aḳhtar’
nazar uThaiye jam-e-sharab se pahle
Leave a Reply