hazar phuul liye mausam-e-bahar aa.e
jo dil ho suukh ke kanTa to kya qarar aa.e
javab le ke phiri shukr naza.a ki hichki
vo ab pukarte hain ham jinhen pukar aa.e
sulajh sakin na miri mushkilen magar dekha
ulajh ga.e the jo gesu unhen sanvar aa.e
falak ko dekh ke hanste ye gul to achchha tha
jo abr aa.e vo gulshan pe ashk-bar aa.e
bahut se yaad hain mahfil men baiThne vaale
kabhi to bhuul ke koi sar-e-mazar aa.e
abhi hai ghuncha-e-dil ki shaguftagi mumkin
hazar baar agar mausam-e-bahar aa.e
ye be-muravvatiyan dekhiye ki lab na hile
jo paas the ham unhen duur tak pukar aa.e
javab mil to gaya go vo dil-shikan hi sahi
yahi sada mire malik phir ek baar aa.e
andheri raat thi achchha kiya jo ai ‘saqib’
charagh le ke su-e-zulmat-e-mazar aa.e
Leave a Reply