Talib Baghpati
mohabbat aag ban jaati hai siina men nihan ho kar
tamanna.en jala deti hain dil chingariyan ho kar
idhar bhi tum udhar bhi tum yahan bhi tum vahan bhi tum
ye tum ne kya qayamat ki nigahon se nihan ho kar
samajhte hain jise manzil fareb-e-rah-e-manzil hai
magar chup huun ye majburi sharik-e-karvan ho kar
unhen bhi dastan-e-hijr chupke se suna hi di
sukun-e-sham-e-gham ban kar sitaron ki zaban ho kar
sahar honi se pahle hi gulabi ho ga.e aansu
shafaq phuli hamari dastan-e-ḳhun-chakan ho kar
unhen niind aa rahi hai ya miri taqdir soti hai
thapakte hain kisi naale shab-e-gham loriyan ho kar
nuqush-e-arzu miT miT ke ubhre ḳhuun hone ko
bisat-e-kahkashan ban kar shafaq ki surḳhiyan ho kar
charagh-e-arzu yuun jhilmila kar bujh gaya aḳhir
dam-e-aḳhir kisi ki yaad aa.i hichkiyan ho kar
ḳhususiyyat ka ‘talib’ huun adavat ho mohabbat ho
mujhi ko bas sata.e ja.iye na-mehrban ho kar
Leave a Reply