sulagti ret pe tahrir jo kahani hai
mire junun ki ik anmol vo nishani hai
main apne aap ko tanha samajh raha tha magar
suna hai tum ne bhi sahra ki khaak chhani hai
ghamon ki dhuup men rahna hai saeban ki tarah
khayal-e-gesu-e-janan ki mehrbani hai
kabhi udhar se jo guzrega karvan apna
to ham bhi dekhenge dariya men kitna paani hai
main ab bhi shaan se zinda huun shahr-e-qatil men
mire khuda ki yaqinan ye mehrbani hai
bura na maano to main saaf saaf ye kah duun
tumhare pyaar ka daava faqat zabani hai
andhera rahta na baaqi kahin magar ‘afzal’
kab andhiyon ne charaghon ki baat maani hai
Leave a Reply