Dard Ka Samundar Hai Sirf Par Hone Tak

dard ka samundar hai sirf paar hone tak

ishq ki haqiqat ke ashkar hone tak

roz-o-shab ki gardish men mahv-e-raqs rahte hain

khaak ke bagule hain bas ghubar hone tak

khvahishon ki khushbu men khvab khvab phirte the

palki men taron ki ham savar hone tak

qurbaton ke jangal men der kitni lagti hai

pairahan mohabbat ka taar taar hone tak

soch ki haveli men ik sukut taari tha

muntazir nigahon ke be-qarar hone tak

atish-e-gham-e-dil men khaak ho gae ham to

rishta-e-mohabbat ke ustuvar hone tak

zindagi ke lahje ko ek umr lagti hai

dhuup ki tamazat se saya-dar hone tak

ajnabi musafir the ham-safar rahe phir bhi

ik gurez haail tha e’tibar hone tak

paniyon ke siine par aaj bhi safine hain

sar-phiri havaon ke sazgar hone tak

kitni maujen Duben-gi sahilon ke daman men

qurbaton ki koshish men raz-dar hone tak

tha kamal-e-kuza-gar Dhalta raha mujh ko

haan ‘farah’ lage barson shah-kar hone tak

Leave a Comment