Ambarin Salahuddin
main ne dekhi hain kisi chehre men aisi ankhen
jin men mere kai anjane savalon ke javab
aisi asani se sachchai ke dar kholte hain
asmanon men zaminon ke sanam bolte hain
main ne jaana hai ki lafzon ke tilismi dhage
kaise tarikh ko unvan nae dete hain
kaise aa milte hain sadiyon ki judai ke asiir
kis tarah khvab nae aks saja lete hain
yunhi is hairat-e-hasti ki panahon men kahin
zindagi sab ke liye apne hunar kholti hai
haan magar khaas qadam uthte hain rahon men tabhi
ye zamin chand sitaron se udhar dolti hai
aur is samt jo dekhun vo nazar bolti hai
main bhala kaun huun kirdar huun kis khake ka
mere hone se jahan bhar ko musibat kya hai
kaise dozakh ka pata mangti huun us ke evaz
meri hasti ki zamane men haqiqat kya hai
main ne dekha hai mira kal kisi guzre pal men
main ne jaana hai kahan mera qadam thahra hai
us ke imroz ko dekha hai to ye ilm hua
meri taqdir mire farda men rakkha kya hai
Leave a Reply