Urooj Qadri
us siine ki vaq.at hi kya hai jis siine men tera nuur nahin
us kasa-e-sar ki kya qimat jo sang-e-junun se chuur nahin
us dil ko koi kyuun dil maane jo jazb-o-junun se ḳhali ho
us sham.a ko ham kyuun sham.a kahen jo partav-e-shama-e-tur nahin
ye kaif-o-nashat afza raten ye aish-o-tarab ki saughaten
jis shai ke evaz men milti hain us shai ka ziyan manzur nahin
murda bhi nahin ye zinda hai malik bhi nahin ye banda hai
insan nirali ḳhilqat hai muḳhtar nahin majbur nahin
insan ki azmat us pe fida ik banda-e-ḳhaki vo bhi tha
jo arsh-e-ilahi chhu aaya phir bhi vo zara maghrur nahin
us jan-e-jahan ki ḳhushnudi matlub-e-junun maqsud-e-safar
socho to ye manzil duur bhi hai socho to ye manzil duur nahin
ho shauq-e-safar to rah-e-safar har samt khuli hai tere liye
dil tera talab se ḳhali hai tu varna yahan ma.azur nahin
ham par vo ‘uruj’-e-ḳhasta-jigar talvar uThate hain lekin
us vaar se taskin kya hogi jo vaar abhi bharpur nahin
Leave a Reply