Aslam Noor Aslam
badal diye hain mukammal nisab ab ke se
paḌhi hai dard ki aisi kitab ab ke se
kaha hai bad-e-saba ne ki be-qarar hain vo
chalo ki koi to aaya javab ab ke se
ghuTan ye siine ki ghaTti nazar nahin aati
juḌe hain kaise na jaane hisab ab ke se
ye kaun puchhega ham se kahan kise fursat
jo dariya-dil the hue kyuun sarab ab ke se
bichhaḌ ke tujh se kahan niind aa.i ab ke bhi
mile hain jagti ankhon ke ḳhvab ab ke se
kisi ki yaad ka muflar zara nikal hi lo
ki hone vaala hai mausam ḳharab ab ke se
ajiib baat hai dil sun nahin raha meri
kisi ka ho gaya ḳhana-ḳharab ab ke se
jo baat hogi barabar ki hogi ab ‘aslam’
ki dil bhi ho gaya mera navab ab ke se
Leave a Reply