Hasnain Aqib
tire dayar se jins-e-muhal le aa.e
javab laane ga.e aur saval le aa.e
bahut se log koi tujh sa DhunDne nikle
majal kis ki jo teri misal le aa.e
shikari dekhta hi rah gaya ba-hairani
parinde mil ke uḌe aur jaal le aa.e
visal hijr siyasat masa.il-e-duniya
ghazal men ham bhi ye kya kya ḳhayal le aa.e
sitam-zarifi hai mushkil pasand logon ki
daraḳht kaaT na paa.e to chhal le aa.e
rula rula diya yaron ne aaj phir ‘aqib’
gham-e-firaq men zikr-e-visal le aa.e
Leave a Reply