Shahnaz Parveen Shazi
ism-e-azam
bahut achchha hua tha maan ne miri
sikhla diye the ism saare
mujh ko bachpan men
tamam ayat-e-qurani vazife aur munajaten
ki jin ke vird se saari balaen duur rahti hain
hisar un ka har aafat aur musibat se bachata hai
unhi ke hifz se hoti rahi mushkil-kushai aur masihai
magar jab vajud us ka
mujassam ajnabi ban kar
gurezan ho gaya mujh se
azaab jankani ban kar
khayal aaya ki shayad bas
vahi ik ism-e-‘azam maan mujhe sikhla nahin paai
jise padhne se us ki sard-mehri sard pad jaae
jo us ke dil ka zangi qufl khole aur vo mujh ko
faqat ik baar izn-e-baryabi de
‘azab-e-narasai khatm kar de aur
naved-e-shadmani de
Leave a Reply