Ishq Hun Jurat-E-Izhaar Bhi Kar Sakta Hun

Fartash Syed

ishq huun jur.at-e-iz.har bhi kar sakta huun

ḳhud ko rusva sar-e-bazar bhi kar sakta huun

tu samajhta hai ki main kuchh bhi nahin tere baghair

main tire pyaar se inkar bhi kar sakta huun

ghair mumkin hi sahi tujh ko bhulana lekin

ye jo dariya hai ise paar bhi kar sakta huun

tu miri amn-pasandi ko ghalat naam na de

vaar sahta hi nahin vaar bhi kar sakta huun

mai-kada kar-e-digar aur janab-e-va.iz

aisi neki main gunahgar bhi kar sakta huun

davara main tiri duniya men to ḳhamosh raha

par sar-e-hashr main takrar bhi kar sakta huun