Waseem Barelvi
zindagi tujh pe ab ilzam koi kya rakkhe
apna ehsas hi aisa hai jo tanha rakkhe
kin shikaston ke shab-o-roz se guzra hoga
vo musavvir jo har ik naqsh adhura rakkhe
ḳhushk miTTi hi ne jab paanv jamane na diye
bahte dariya se phir ummid koi kya rakkhe
aa gham-e-dost usi moḌ pe ho ja.un juda
jo mujhe mera hi rahne de na tera rakkhe
arzuon ke bahut ḳhvab to dekho ho ‘vasim’
jaane kis haal men be-dard zamana rakkhe
Leave a Reply