be-vaz.a shab-o-roz ki tasvir dikha kar
ab daad na mango mujhe zanjir dikha kar
kaisi hain kaf-e-lauh pe be-rabt lakiren
ma.ani na chhupao mujhe tahrir dikha kar
ai shisha-e-jan tujh men lahu ḳhatm bhi hoga
ye nashsha utar ja.ega tasir dikha kar
main sham-e-shab-zulm huun aghaz-e-sahar tak
dil bujhne laga sub.h ki tanvir dikha kar
kis shaḳh pe hai harf-e-gul-e-surḳh dikhao
qaa.il bhi karo lafz ki tafsir dikha kar
yuun sehr-e-kashish ne kiya e.ajaz ka munkir
divar-e-hava par mujhe shahtir dikha kar
hai koh-kani bar-e-amanat abhi sar par
mat rok mujhe tesha-o-taqdir dikha kar
kahte ho ki ḳhvahish ka samar tursh hai ‘shahid’
ankhon ko ghalat ḳhvab ki ta.abir dikha kar
Leave a Reply