dil jo tesha-zani pe maail hai
kuchh na kuchh raste men haail hai
tu jo hairat-zada nahin hota
tu miri guftugu ka qaail hai
main musafir huun kohna rasmon ki
mere aage rah-e-qabail hai
kya sunaun main hal-e-dil ki ye dil
teri kaj-fahmiyon se ghayal hai
raqs karta hai harf harf mira
mere lahje men kaun paail hai
mere pairon ko dasne vaala saanp
meri gardan men kyuun hamail hai
Leave a Reply