ye ishq ajab lamha-e-tauqir hai janan
khud mera khuda us ki hi tafsir hai janan
jo naam hatheli ki lakiron men nahin tha
kyuun aaj talak dil pe vo tahrir hai janan
us khvab ki taabir to mumkin hi nahin thi
ankhon men magar us ki hi tasir hai janan
maana ki tire hathon men hain phuul abhi tak
lekin tire pairon men jo zanjir hai janan
kya janiye kis roz bikhar jaae kahin bhi
is aas ki dil men jo ik tanvir hai janan
ye rog kahin mujh ko hi mismar na kar de
aa laut kar aa tu hi to iksir hai janan
tu hijr men duubi hui nayya ka kinara
jivan ki tire paas hi tadbir hai janan
ye zakhm judai ke kabhi silne nahin hain
tu jaan le apni yahi taqdir hai janan
us aag ke shoalon men vo phulon ka tabassum
ik sajda-e-be-misl ki tasvir hai janan
ab din ki talab hi nahin ‘shahin’ mujhe to
ik shaam hi ab to miri jagir hai janan
Leave a Reply