Aabshaaron Ki Yaad Aati Hai

ābshāroñ kī yaad aatī hai

phir kināroñ kī yaad aatī hai

jo nahīñ haiñ magar unhīñ se huuñ

un nazāroñ kī yaad aatī hai

zaḳhm pahle ubhar ke aate haiñ

phir hazāroñ kī yaad aatī hai

aa.ine meñ nihār kar ḳhud ko

kuchh ishāroñ kī yaad aatī hai

aur to mujh ko yaad kyā aatā

un pukāroñ kī yaad aatī hai

āsmāñ kī siyāh rātoñ ko

ab sitāroñ kī yaad aatī hai

Leave a Comment