bevafai karke niklun ya vafa kar jaunga
shahr ko har zaiqe se ashna kar jaunga
tu bhi dhundega mujhe shauq-e-saza men ek din
main bhi koi khub-surat si khata kar jaunga
mujh se achchhai bhi na kar meri marzi ke khilaf
varna main bhi haath koi dusra kar jaunga
mujh men hain gahri udasi ke jarasim is qadar
main tujhe bhi is maraz men mubtala kar jaunga
shor hai is ghar ke angan men ‘zafar’ kuchh rose aur
gumbad-e-dil ko kisi din be-sada kar jaunga
Leave a Reply