Tabir Se Mahrum Tere KHwab Bahut The

Khalid Iqbal Yasir

ta.abir se mahrum tire ḳhvab bahut the

saada si kahani thi magar baab bahut the

aa lagti kinare se miri kashti-e-jan bhi

shayad ki mire paanv men girdab bahut the

be-nam hue naam ki takrim ke hathon

pahchanta kya koi ki alqab bahut the

afsos tamavvuj unhen sahil pe na laaya

anmol guhar varna tah-e-ab bahut the

har lahza badalti hui rut bas men nahin thi

joban pe thi barsat to shadab bahut the

kuchh ham bhi bahut se ga.e namnak hava men

kuchh tum bhi to amada-e-i.jab bahut the

ham apne hi paband nahin the kabhi ‘yasir’

uTh aa.e ki taqrib ke adab bahut the