Saleem Ansari
faza men chha.e hue hain udaas sannaTe
hon jaise zulmat-e-shab ka libas sannaTe
tire ḳhayal ki aahaT ne sard kar Daala
sulag rahe the abhi as-pas sannaTe
ḳhudi ke nanhe farishton ko loriyan de kar
jaga na den kahin jismon ki pyaas sannaTe
uThao sang-e-sada aur zor se phenko
bikhar hi ja.enge ye be-qayas sannaTe
ye ahl-e-zarf ki himmat ko azmate hain
har ek dil ko nahin aate raas sannaTe
‘salim’ shaam ki tarikiyan baḌhate hain
yahi daraḳht pe laTke udaas sannaTe
Leave a Reply