hisar-e-gham se nikal apni zindagani bacha
nigah-e-hijr men aa.i hui javani bacha
ye log pyaar ke hasid hain mere qissa-go
kisi ki ek na sun tu faqat kahani bacha
ajiib ranj tha jis ne ye aankh banjar ki
main itna roya miri aankh men na paani bacha
har ek chiiz na ghusse se kuḌe-dan men phenk
qarar-e-dil ko bhi us ki koi nishani bacha
ḳhizan ruton ne bhi barson talak jalaya mujhe
numu ko bhi na koi dast-e-baghbani bacha
rafaqaton ka hasan aur kuchh nahin hasil
bacha to dil men faqat ranj-e-ra.egani bacha
Leave a Reply