har shaḳhs men kuchh log kami DhunD rahe hain
nadan hain musbat men nafi DhunD rahe hain
gul DhunD rahe hain na kali DhunD rahe hain
gulshan men bas ik shaḳh hari DhunD rahe hain
is yug men kahan ham bhi vali DhunD rahe hain
insan men sifat-e-bashari DhunD rahe hain
badal ki siyahi men kiran jaisi chamakti
har gham men chhipi ham bhi ḳhushi DhunD rahe hain
ik sher jo mauzun nahin kar paa.e hain ab tak
‘ghalib’ ki ghazal men bhi kami DhunD rahe hain
muddat se taqaza hai ki lauTa do mira dil
muddat se bahana hai abhi DhunD rahe hain
tahzib-o-tamaddun ko ḳhulus aur vafa ko
‘azam’ hi nahin aaj sabhi DhunD rahe hain
Leave a Reply