Ye Visal O Hijr Ka Masala to Meri Samajh Mein Na Aa Saka

Hilal Fareed

ye visal o hijr ka mas.ala to miri samajh men na aa saka

kabhi koi mujh ko na pa saka kabhi main kisi ko na pa saka

ka.i bastiyon ko ulaT chuka koi taab is ki na la saka

magar andhiyon ka ye silsila tira naqsh-e-pa na miTa saka

miri dastan bhi ajiib hai vo qadam qadam mire saath tha

jise raz-e-dil na bata saka jise dagh-e-dil na dikha saka

na hi bijliyan na hi barishen na hi dushmanon ki vo sazishen

bhala kya sabab hai bata zara jo tu aaj bhi nahin aa saka

kabhi raushni ki talab rahi kabhi hauslon ki kami rahi

main charagh ko tire naam ke na jala saka na bujha saka

vo jo aks rang-e-‘hilal’ thi vo jo aap apni misal thi

mujhe aaj tak hai ḳhalish yahi tujhe vo ghazal na suna saka