jahez kam tha bahu aag men utari hai
hamare gaanv men ab tak ye rasm jaari hai
qadam uTha.ungi to ḳhaak par lahu hoga
paḌi hai pair jo zanjir mujh se bhari hai
rida-e-hijr pe jo dard ki kaḌha.i ki
tumhari yaad men ye pahli dast-kari hai
sukut-e-sham ka manzar hai aur bujhi ankhen
udasi had se baḌhi hai to kitni pyari hai
ye mera dil nahin ujḌa hua makan hai koi
ye meri aankh nahin zaḳhmon ki kiyari hai
Leave a Reply